حبيبي لو تضيق الأرض وصدور العباد تضيق
يعز انك علي من الزعل تقطع مراسيلك
أنا يا مرهف الإحساس مدري يا سُلاف الريق
بصدري ودّي اضمّك عن الأحزان واشيلك
عليك اخاف من جرح الكلام ولوعة التدقيق
واحنّك من قساي ومن قسى الأيام و آوي لك !
لك الله ما قدرت اسلا بعدك ولا قدرت اطيق
تفاصيل الحياة .. اللي ما فيها من تفاصيلك
يثير الليل شوقي | والنهار ! يزيدني تشويق
من الأسرار .. وش درّا النهار اني صبا ليلك
يا ربّة قلبي اللي ما لقى في غيرك التوفيق
ولا يوصل مقامه في الغرام إلا مواصيلك
تعبت من الحقيقه والحقيقه ماتبي تحقيق
واكذّبها .. عن الشكِه واصدّق كذبة ابريلك
شعور الحب في قلب الشجاع اكرم من التلفيق
لذا ما اعرف اغني فيك .. كثر ما اعرف اغني لك .
التعليقات
لا توجد تعليقات بعد — كن أوّل من يعلّق.